Tilfinningaleikni

HVERNIG, HVER, HVAR, HVENÆR, HVERSVEGNA?

2. Kafli – hvernig persóna er “ég”? 

XII.Tilfinningaleikni

Um meðvitaða leiðsögn

Í bókinni Saga um tilfinningar, www.medvitaduppeldi.is, kemur fram að meðvitað uppeldi (höfundur handbókar notar: meðvituð leiðsögn) byggir á þeirri tilgátu að því meðvitaðri sem leiðbeinendur eru því betur séu þeir í stakk búnir til að sinna leiðsögn sinni.   Það er að segja ef okkur tekst að dýpka okkar eigin skilning á okkur sjálfum og tilfinningum okkar getur það skipt sköpum fyrir okkur og gert okkur að betri leiðbeinendum.

Hvers vegna meðvituð leiðsögn?

Að vera meðvitaður um sjálfan  sig þýðir fyrst og fremst að skilja hvað býr að baki tilfinninga okkar, hræðslu og drauma.   Við komum flest úr uppeldinu með hræðslu við ýmislegt í okkar farteski, og meðan við vitum hvorki að við séum hrædd né hvaðan sú hræðsla kemur þá stjórnar hún meira eða minna lífi okkar. Og oft hefur þessi hræðsla eða ótti mikil áhrif á fullorðna leiðbeinendur.

Það er líklegt að leiðbeinendur láti það sama ganga yfir nemendur og leiðbeinandinn ólst  sjálfur upp við.  Leiðbeinandi, sem kemur úr öruggu umhverfi er líklegri til að veita nemanda öryggi.   Ef leiðbeinandi kemur úr óöruggu umhverfi, fullu af ótta og reiði við jafnvel eitthvað sem ekki var skilningur á eða ekki var til staðar þor til að horfast í augu við, þá eru líkur á því að leiðbeinandinn flytji áfram þetta mynstur. Þessu er hægt að breyta með því að vinna í sjálfum sér, horfast í augu við það hver við erum og hvaða tilfinningar við glímum við.   Þetta er mikil vinna en einnig skemmtileg vinna, því árangurinn er svo mikill, einmitt þegar byrjað er að vinna í hlutunum.   Hvað er skemmtilegra en að kynnast sjálfum sér betur og komast yfir höft sem hafa kannski fylgt okkur frá blautu barnsbeini?

Það að þekkja okkar eigin tilfinningar, auðveldar okkur að skilja tilfinningar annarra.   Allar tilfinningar, eru samt réttmætar, því þær eru til staðar.   Það er hins vegar hægt að vinna með slæmar tilfinningar, og vinna sig út úr þeim, alveg eins og hægt er að vinna með og auka góðar tilfinningar, samanber ást og kærleika.   Þegar tilfinningar annarra birtast okkur, eigum við að sýna þeim skilning; brosa á móti þegar brosað er og velta fyrir okkur hvers vegna neikvæð tilfinning kemur upp í fari annarrar manneskju.   Oft þarf mjög lítið til að hægt sé að breyta neikvæðri tilfinningu í jákvæða tilfinningu!   Oft eru þó einnig neikvæðar tilfinningar bældar niður en þá festast þær í undirvitundinni, þangað til þær eru losaðar upp.   Þessar neikvæðu tilfinningar geta komið fram í hegðunarvanda og margvíslegum vandamálum á öllum aldri.   Sýna þarf öllum tilfinningum virðingu og vinna síðan úr því sem vinna þarf úr til að losa út neikvæða tilfinningu.

  

Tilfinningar okkar!

 

Sem dæmi um bækur um uppeldi má nefna Hollráð Hugos eftir Hugo Þórisson og Uppeldi er ævintýri eftir Margréti Pálu Ólafsdóttur, stofnanda og leikskólastjóra Hjallastefnunnar.