Eigin forsendur

HVERNIG, HVER, HVAR, HVENÆR, HVERSVEGNA?

2. Kafli – hvernig persóna er “ég”? 

VI.Eigin forsendur

v  Tilgangur: Kenna nemendum sjálfstæði og að “vinna” fyrir sjálfa sig í lífinu.   Þar með er ekki verið að segja að nemandi eigi ekki að aðstoða við frágang á sínu vinnustæði og sínu umhverfi og við heimilisstörf, en þá út frá því að það að ganga frá eftir sig sé eðlilegur hlutur.   Aðstoð og hjálp við aðra er síðan annar útgangspunktur sem er val nemandans en við höfum komið inn á það hér áður í bókinni.

q  Aðferð: Kenna nemanda að lifa lífinu á eigin forsendum.   Hjálpa nemanda að vera sjálfstæður, það er að segja, að gera hlutina út frá eigin hjarta.   Ekki láta aðra teyma sig áfram – ekki gera eitthvað bara til að þóknast öðrum.   Kenna nemanda að fylgja ekki hópnum, bara til að fylgja hópnum, heldur vera hann sjálfur innan hópsins og í öllum aðstæðum.   Velja, hvort fylgja eigi hóp eða fara eigin leiðir.   Hafa þor til að segja nei ef eitthvað er í boði sem viðkomandi vill ekki og muna að fylgja eigin löngun óháð því sem aðrir gera.   Það er gríðarlega mikilvægt að treysta eigin dómgreind.   Ekki láta segja sér hvað eigi að gera og  hvernig eigi að gera það í öllum aðstæðum.   Auðvitað er gott að leita sér þekkingar og upplýsinga en síðan þarf að nýta eigin dómgreind til að skilja kjarnann frá hisminu, það er að segja að nýta eigin dómgreind til að ákveða hvaða upplýsingum nemandinn vilji ganga út frá.