Demanturinn "ég"!

6.Kafli - Hvar er „ég“ í tilverunni?

IX.Demanturinn „ég“!

Alheimsorkan er orkan í heiminum eins og við höfum áður fjallað um.   Alheimsorkan er það dýrmætasta í heiminum, því annars væri ekkert líf til.   Allt er gert úr orku sem er misjafnlega samþjöppuð.   Sterkasta efnið í heiminum er demantur.   Ekkert efnasamband er sterkara en demantur.   Ef sólin, sem er eins og brennandi kolamoli, kólnaði niður, þá myndi hún breytast í risastóran demant.   Sólin er tákn lífsins sem þýðir að sólin er tákn demantsins.  Þannig að hægt er að segja að Guð sé demantur.   Guð er þá demantur sem er sterkasta og dýrmætasta efnið í heiminum.   Hvert og eitt okkar er því í raun demantur, skínandi ljósorka,  því hvert og eitt okkar er búið til í Guðs mynd.

Aðferð: Skoða demanta með berum augum og í smásjám.   Bera demanta upp að sólargeislunum og sjá hvernig allir regnbogans litir speglast í demantinum.   Enginn annar steinn er jafn tær og endurspeglar jafn fallega liti regnbogans, grunnliti alheimsins, og demanturinn.   Hver og einn demantur er einstakur.   Enginn demantur er nákvæmlega eins, ekki frekar en manneskjurnar, þeir hafa sín séreinkenni og hægt er að greina hvaða stein um er að ræða ef þeir hafa verið skráðir eins og gert er með dýrmætustu demantana.  

Aðferð: Hver og einn nemandi gæti skrifað, teiknað eða sagt frá sínum demanti þ.e. þeim demanti sem hann tók til skoðunar.   Hvernig upplifir nemandinn demantinn?

Aðferð: Spyrja nemendur: „Ef þú værir demantur, hvernig mundir þú þá vilja vera?"