Allt fólk er samferðafólk

7.Kafli - Hver er tilgangurinn með veru minni hér á jörðinni

V.Allt fólk er samferðafólk

Enginn hefur eignarétt yfir öðrum, við erum bara samferða á jörðinni, erum þar til að þroskast, upplifa, styðja við aðra og fá stuðning frá öðrum á ferðalagi okkar á jörðinni.   Hver og einn er einstök sál, hver og einn á sinn tilvistarrétt.   Á fullorðinsárum á hver og einn að treysta á sjálfan sig og bera ábyrgð á sjálfum sér, hverjum og einum eiga að veitast þau sjálfsögðu mannréttindi að fá að bera ábyrgð nema þegar um veikindi eða fötlun er að ræða og viðkomandi þarf aðstoð og þá á hann að fá þá aðstoð sem hann sjálfur óskar eftir.   

 Manneskja á ekki að lifa í gegnum aðra manneskju.   Hver og einn lifir fyrir sig og á sínum forsendum.   Þess vegna er það þannig að hamingjan getur aldrei komið nema frá eigin hjarta, það er enginn sem getur fært öðrum hamingjuna á silfurfati, það er aldrei ein manneskja sem færir annarri manneskju hamingjuna, þó oft sé litið svo á að nú hafi þessi eða hinn fundið hamingjuna með því að eignast barn, eignast maka, eignast veraldlega hluti, mennta sig, finna draumastarfið og svo má áfram telja.   

 Við eigum að líta á og koma fram við allar manneskjur sem bræður okkar og systur, andlega tengdar, þó hver um sig sé samt sjálfstæð og einstök manneskja, alveg óháð því hlutverki sem við, eða aðrar manneskjur, gegnum í lífi okkar.  

Hamingjan er innri tilfinning sem einstaklingurinn sjálfur getur einn fundið með því að vinna í sjálfum sér og finna eigin innri vellíðan.   Með því getur einstaklingurinn síðan séð hlutina í nýju ljósi og samglaðst öðrum, notið þess að vera samvistum með öðrum, notið þæginda, notið starfsins eða þekkingarinnar sem fékkst í gegnum menntun, vinnu eða lífið sjálft.   Við lifum í samvistum við annað fólk í þeim tilgangi að gefa af okkur og þiggja frá öðrum.  

Við erum hér saman á jörðinni til að styðja hvert annað og læra hvert af öðru, þess vegna erum við samferða þeim sem við erum samferða hverju sinni.